Sahibul Hikayat merupakan tradisi lisan yang kegiatannya dilakukan dengan tujuan dan maksud tertentu.

Tukang cerita yang membawakan sahibul hikayat sengaja ditanggap untuk membawakan cerita tertentu. Biasanya cerita yang dibawakan berasal dari Hikayat 1001 Malam.

Juru cerita yang terkenal diantaranya Haji Ja'far, Haji Ma'ruf, dan Haji Ja'it.

Berikut petikan cerita Nurlaila Putri Jin yang biasa dibawakan oleh Haji Muhammad Zahid atau Haji Ja'it.

Alkisah, kata di dalam hikayat pujangga yang empunya cerita, di benua negeri Syarkistaniyah ada duduk seorang raja yang memerintah, yang bernama Tuan Baginda Raja Malik Ibrohim. Dan Tuan Baginda Malik Ibrohim, kata didalem hikayat, sudah mempunyai seorang anak laki-laki atau putra mahkota yang bernama Tajul Arifin. Kata di dalem hikayat, putra mahkota ini sudah jadi pemuda, atau remaja putra, disampung itu orangnya keliatan cakep serenta dengan gagahnya.

Kita tidak ceritaken panjang si putra mahkota.
Sekarang kita ceritaken keadaannya Tuan Baginda Raja Malik Ibrohim yang sedang duduk-duduk dengan permaisurinya sambil ngomong-ngomong untuk maksud mencariken pasangan idup buat putranya yaitu Tajul Arifin. Maka Raja beromong dengan permaisurinya.

Raja: Adinda Suri

Permaisuri: Ade ape kakenda

Raja: Begini dinda, kanda nih ude lama pengen ngomong soal anak kite di Tajul Arifin.

Permaisuri: Eh kanda, emangnye kenape anak kite, kakenda, Ape kepalanye botak lantaran maen bole di Petak Sinkian, ape kenape.

Raja: Dinda, dinda, kepale si Tajul le botak, bukan, bukan perkare bola. Soalnye begini. Anak kite sekarang pan uda gede. Apalagi umurnye ude dua puluh lima. Ude pantes dong die diadu, pan nyang laen-laen juga begitu.

Permaisuri: Diadu pegimane kanda, emangnye si Tajul ude berobah jadi jangkrik ape.

Raja: Dinda, diadu itu pribase kate, maksudnye dicariin jodo, begitu...

Permaisuri: Kanda, kanda, kirain sih anak kite kenape, kagak taunya mau dicariin jodo. Na, kakenda deh nyang tulung serep-serepin, perawan mane nyang pantes jadi timpalan si Tajul. Cuman begini, kanda. Anak sekarang pan laen, ape enggak ade baeknye kalu kite tanyain dulu sama si Tajul. Ma'lum deh, salah-salah buatan kita nyang jadi orang tua nyang disalahin. Mendingan tanya dulu deh ame die, ape kemauannye.

Bersambung...

Sumber: Buku Bacaan Penunjang Mulok Ragam Budaya Betawi Propinsi DKI Jakarta 2002